Լեռնային Ղարաբաղի Հանրապետության ոստիկանության պետը քննարկեց ճանապարհային ոստիկանության 2015թ. 9 ամիսների ծառայողական գործունեության արդյունքները

Սույն թվականի հոկտեմբերի 21-ին ԼՂՀ ոստիկանության ճանապարհային ոստիկանությունում կայացած խորհրդակցությունը նվիրված էր 2015թ-ի 9 ամիսների ընթացքում ճանապարհային ոստիկանության և ենթակա ստորաբաժանումների կողմից կատարած աշխատանքների քննարկմանը:

Խորհրդակցությունը վարում էր ԼՂՀ ոստիկանության պետ, գեներալ-մայոր Կամո Աղաջանյանը:

Հիմնական զեկույցով հանդես եկավ ճանապարհային ոստիկանության պետ, ոստիկանության մայոր Իգոր Օհանյանը:

2015թ-ի 9 ամիսների ընթացքում հանրապետության տարածքում գրանցվել է 57 ճանապարհատրանսպորտային պատահար, որոնց հետևանքով զոհվել է 11 և վիրավորվել` 67 մարդ, նախորդ տարվա նույն ժամանակահատվածի 42 պատահարի, 12 զոհի և 47 վիրավորի դիմաց: Վիճակագրությունից դիտվում է, որ 15-ով աճել են ճանապարհատրանսպորտային պատահարների և 20-ով վիրավորների, իսկ 1-ով նվազել զոհերի  թիվը:

Ըստ շրջանների վերլուծելով ճանապարհատրանսպորտային պատահարների պայմաններն ու պատճառները՝ ոստիկանության պետը մայրաքաղաք Ստեփանակերտը, Ասկերանի և Շահումյանի շրջանները  սպասարկող ճանապարհապարեկային վաշտի պատասխանատուներին խստագույնս հանձնարարեց ակտիվացնել ճանապարհատրանսպորտային պատահարների կանխարգելման ուղղությամբ իրականացվող   միջոցառումները:

Ծառայողական գործունեության գնահատականը թողնելով ընթացիկ տարվա արդյունքների վերլուծությանը՝ ոստիկանության պետ, գեներալ-մայոր Կամո Աղաջանյանը, այնուամենայնիվ, գոհունակություն հայտնեց կատարած ծառայության արդյունքներից և մի շարք ուղղություններով տվեց կոնկրետ հանձնարարականներ: 

«Անպատժելիությունը ամենաթողության ծնունդն է», երթևեկության կանոնների յուրաքանչյուր այսպես ասած միտումնավոր անուշադրության համար ճանապարհային ոստիկանության ծառայողը ամենախստագույն պատասխանատվության է ենթարկվելու: Ճանապարհային ոստիկանությունը համակարգի հայելին է, իսկ հայելու վրա, ինչպես հայտնի է նույնիսկ աննշան բիծն անգամ ոչ միայն աչքի է զառնվում, այլև կորցնում է նրա ողջ փայլն ու  հետևաբար նաև օգտագործման նշանակությունը: Մենք Ձեզ հետ միասին պարտավոր ենք ստեղծել լիարժեք անվտանգ հասարակարգ: Արցախի ժողովուրդը փառապանծ ուղի է անցել և արժանի է իր սեփական հողում իրեն լիարժեք պաշտպանված զգալու: Կատարյալ արդարություն, ահա թե ինչ է պահանջում և ակնկալում մեզնից մեր հասարակությունը, իսկ մենք պարտավոր ենք ականջալուր լինել մեր ժողովրդի պահանջներին», - նշեց ոստիկանության պետը: