Վերընտրվեց «ԼՂՀ ոստիկանության վետերանների միավորում» հասարակական կազմակերպության խորհուրդը

2015թ. դեկտեմբերի 18-ին, ոստիկանության կենտրոնական ապարատի նիստերի դահլիճում կայացավ «ԼՂՀ ոստիկանության վետերանների միավորում» հասարակական կազմակերպության  խորհրդի հաշվետու ընտրական ժողովը:

Ժողովին մասնակցում էր ԼՂՀ ոստիկանության պետի տեղակալ-շտաբի պետ, ոստիկանության գնդապետ Բորիս Ենգիբարյանը:

Օրակարգում ներառված էին՝ «ԼՂՀ ոստիկանության վետերանների միավորում» հասարակական կազմակերպության 2014-2015թթ. կատարած աշխատանքների և վերստուգիչ հանձնախմբի հաշվետվությունները, ինչպես նաև կազմակերպության խորհրդի կազմի, նախագահի ու վերստուգիչ հանձնախմբի ընտրությունների հարցերը:

2014-2015թթ. կատարած աշխատանքների վերաբերյալ հաշվետվությամբ հանդես եկավ «ԼՂՀ ոստիկանության վետերանների միավորում» հասարակական կազմակերպության նախագահ Վոլոդյա Ստեփանյանը:

«ԼՂՀ ոստիկանության վետերանների միավորում» հասարակական կազմակերպությունն իր գործունեությունը հաշվետու ժամանակաշրջանում իրականացրել է կանոնադրությամբ սահմանված լիազորությունների շրջանակներում:

Կազմակերպության  դրամական  միջոցները օրենքով  և կանոնադրությամբ սահմանված կարգով  գոյանում են` բարեգործական-մարդասիրական  ընկերությունների, մասնավոր  անձանց,  անհատ  ձեռներեցների կամավոր ներդրումներից ու  նվիրատվություններից: Վոլոդյա Ստեփանյանը իր գոհունակությունը հայտնեց ԼՂՀ ոստիկանության պետին՝ կազմակերպության խնդիրները հոգալու և ոստիկանության յուրաքանչյուր վետերանի նկատմամբ ցուցաբերվող ինչպես բարոյական, այնպես էլ  նյութական  աջակցության համար: Ուստի, վետերանների միավորման յուրաքանչյուր անդամի պարտքն է մասնակցել և աջակցություն ցուցաբերել ոստիկանության ծառայողների կողմից հասարակական կարգի ապահովման, հանցագործությունների կանխարգելման ու բացահայտման աշխատանքներին:    

Ելույթով հանդես եկավ ԼՂՀ ոստիկանության պետի տեղակալ-շտաբի պետ, ոստիկանության գնդապետ Բորիս Ենգիբարյանը, ով փոխանցեց ԼՂՀ ոստիկանության պետի տեսանկյունը «ԼՂՀ ոստիկանության վետերանների միավորում» ՀԿ դերակատարության առումով և ոստիկանության վետերաններին առաջարկեց ավելի նախաձեռնող լինել՝ օժանդակելով ոստիկանության համակարգի երիտասարդ կադրերին ուսանելու գործին: Բորիս Ենգիբարյանը համոզմունք հայտնեց, որ ոստիկանության պետը տեղեկացված է ոստիկանության վետերանների խնդիրներին և բոլոր դեպքերում անմիջապես արձագանքում ու բարեգործական խողովակներով աջակցում է կարիքավորներին:

 Օրերս, տաքսու վարորդի նկատմամբ ավազակություն գործող դանակով զինված հանցագործին վնասազերծելու, ասել է թե հանցավորության դեմ պայքարում ցուցաբերած նվիրվածության համար ԼՂՀ ոստիկանության պետի կողմից ոստիկանության մայոր Սամվել Գաբրիելյանը արժանացավ դրամական պարգևի, որը հասցեատիրոջը փոխանցեց ԼՂՀ ոստիկանության պետի տեղակալը:

Այնուհետև, տեղի ունեցավ միավորման խորհուրդի անդամների ընտրութունը: Սկզբից ընտրվեց խորհրդի կազմը, իսկ հետո նաև վերստուգիչ հանձնաժողովի նախագահը և անդամները: «ԼՂՀ ոստիկանության վետերանների միավորում» ՀԿ նախագահ վերընտրվեց գնդապետ Վոլոդյա Ստեփանյանը: