Կոլեգիայի նիստ՝ ԼՂՀ ոստիկանության պետի ղեկավարությամբ

Սույն թվականի հուլիսի 31-ին ԼՂՀ ոստիկանությունում տեղի ունեցավ  կոլեգիայի նիստ, որի օրակարգը նվիրված էր ԼՂՀ ոստիկանության  ծառայությունների և տարածքային մարմինների 2015թ. 1-ին կիսամյակի օպերատիվ-ծառայողական գործունեության արդյունքների ամփոփմանը, ինչպես նաև 2015թ. հունիսի 1-ից 15-ն ընկած ժամանակահատվածում «ԼՂՀ ոստիկանության տարածքային մարմիններում և ստորաբաժանումներում անցկացված հսկողական ստուգումների արդյունքների քննարկմանը»:  

Նիստը վարում էր ԼՂՀ ոստիկանության պետ, գեներալ-մայոր Կամո Աղաջանյանը:

Մասնակցում էին ԼՂՀ ոստիկանության ղեկավար կազմը, տարածքային ստորաբաժանումների և ծառայությունների պատասխանատուները:

ԼՂՀ ոստիկանության  ծառայությունների և տարածքային մարմինների 2015թ. 1-ին կիսամյակի օպերատիվ-ծառայողական գործունեության արդյունքների վերաբերյալ զեկույցով հանդես եկավ ԼՂՀ ոստիկանության պետի առաջին տեղակալ, ոստիկանության գնդապետ Անդրանիկ Հակոբյանը:

Օրակարգի երկրորդ հարցի՝ ԼՂՀ ոստիկանության տարածքային մարմիններում և ստորաբաժանումներում անցկացված հսկողական ստուգումների արդյունքների վերաբերյալ զեկույցով հանդես եկավ ոստիկանության պետի տեղակալ-շտաբի պետ, ոստիկանության գնդապետ Բորիս Ենգիբարյանը:

Այնուհետև ԼՂՀ ոստիկանության պետի տեղակալ-շտաբի պետ Բորիս Ենգիբարյանը ներկայացրեց 2015թ. 1-ին կիսամյակի օպերատիվ-ծառայողական գործունեության արդյունքներով կոլեգիայի որոշման նախագիծը:

ԼՂՀ ոստիկանության պետ, գեներալ-մայոր Կամո Աղաջանյանը, բավարար գնահատելով ԼՂՀ ոստիկանության 2015թ. 1-ին կիսամյակի օպերատիվ-ծառայողական գործունեության արդյունքները, տարածքային ստորաբաժանումների և ծառայությունների բոլոր պատասխանատուների կատարած աշխատանքը ենթարկեց հրապարակային քննարկման և կոնկրետ գնահատական տվեց յուրաքանչյուրին: 

Ոստիկանության պետը իր խորին մտահոգությունը հայտնեց հանցագործությունների աճի և բացահայտման ուղղությամբ տարվող աշխատանքներից և տարածքային ստորաբաժանումների պետերին պահանջեց մեկ առ մեկ ներկայացնել չբացահայտված հանցագործությունների պատմությունները ու մանրամասն վերլուծելով դրանք՝ կոնկրետ հանձնարարականներ տվեց պատասխանատուներին:

Կարևորելով անչափահասների շրջանում իրականացվող պրոֆիլակտիկ կանխարգելիչ միջոցառումների, ինչպես նաև ապօրինի պահվող զենք-զինամթերքի կամավոր հանձնման, որսորդական  հրազենի  գրանցման ուղղությամբ բնակչության շրջանում տարվող բացատրական աշխատանքների ակտիվացման անհրաժեշտությունը՝ ոստիկանության պետը պահանջեց  հոգատարություն և հետևողականություն  դրսևորել քաղաքացիների հետ հարաբերություններում և առավելագույնս սեղմ ժամկետներում լուծում տալ նրանց հուզող հարցերին:

«Յուրաքանչյուր հանցագործություն, թե իրավախախտում՝ ծնունդն է ամենաթողության, հասարակության մեջ ոստիկանի հանդեպ վստահության ամրապնդման մասին խոսք լինել չի կարող, եթե մեզ չի հաջողվում արագ բացահայտել այն ու մեղավորին հանձնել արդարադատությանը», - նշեց ոստիկանության պետը:

Գեներալ-մայոր Կամո Աղաջանյանը կարևորեց նաև սեպտեմբերին նախանշված տեղական ինքնակառավարման մարմինների ընտրությունների նախապատրաստական աշխատանքների՝ ընտրացուցակների ճշգրտման և ընտրությունների ընթացքում հասարակական կարգի ու հասարակության անվտանգության ապահովման ուղղությամբ իրականացվող աշխատանքների ակտիվացումը:

Նիստի երկրորդ հարցի՝ ԼՂՀ ոստիկանության տարածքային մարմիններում և ստորաբաժանումներում անցկացված հսկողական ստուգումների վերաբերյալ ոստիկանության պետը հանձնարարեց հետևողական լինել ոստիկանության գործունեությունը օրենքի տառին համապապատասխան կազմակերպելուն և անշեղորեն իրականացնելուն:

2015 թվականի 1-ին կիսամյակի օպերատիվ-ծառայողական գործունեության արդյունքների վերաբերյալ համառոտ տեղեկանքը զետեղված է կայքի «Վիճակագրություն» բաժնի «Կիսամյակ» ենթաբաժնում: