ԿԱՅՔԻ ՔԱՐՏԵԶ
ԹԵԺ ԳԻԾ
03.04.2018 18:45
Կադրային փոփոխություններ ոստիկանության պետի հրամանով
Արցախի Հանրապետության ոստիկանության տարածքային ստորաբաժանումների ծառայության արդյունավետությունը էլ ավելի բարձրացնելու նպատակով Արցախի Հանրապետության ոստիկանության պետ¸ գեներալ-մայոր Կամո Աղաջանյանի սույն թվականի ապրիլի 3-ի հրամանով ոստիկանության Ասկերանի շրջանային բաժնի պետ¸ ոստիկանության փոխգնդապետ Արայիկ Գասպարյանը ազատվել է ոստիկանության Ասկերանի շրջանային բաժնի պետի պաշտոնից և նշանակվել ոստիկանության Մարտունու շրջանային բաժնի պետի պաշտոնին։ Ոստիկանության պետի մեկ այլ հրամանով ոստիկանության փոխգնդապետ Ջիվան Ղահրամանյանը ազատվել է ոստիկանության Մարտունու շրջանային բաժնի պետի պաշտոնից և գրանցվել Արցախի Հանրապետության ոստիկանության կադրերի ռեզերվում։
Ոստիկանության Մարտունու շրջանային բաժնի նորանշանակ պետին ներկայացնելու նպատակով գեներալ-մայոր Կամո Աղաջանյանը անձամբ հանդիպեց ոստիկանության Մարտունու շրջանային բաժնի անձնակազմի հետ։ Հանդիպմանը ներկա էին Մարտունու շրջվարչակազմի ղեկավար Կարեն Թովմասյանը և շրջանի իրավապահ կառույցների պատասխանատուները։
Խիստ քննադատության ենթարկելով վերջերս Մարտունու շրջանում գրանցված խուլիգանության հանցադեպը¸ ոստիկանության պետը ոստիկանության Մարտունու շրջանային բաժնի նորանշանակ պետ¸ ոստիկանության փոխգնդապետ Արայիկ Գասպարյանից պահանջեց բոլոր ուժերը ներուղղել նման դեպքերը կանխարգելելու և շրջանի օպերատիվ իրավիճակի կայունության անշեղ ապահովման հրամայականին։ Եվս մեկ անգամ կարևորելով ծառայությունը անկողմնակալ իրականացնելու պարտականությունը¸ գեներալ-մայոր Կամո Աղաջանյանը ոստիկանության Մարտունու շրջբաժնի անձնակազմից պահանջեց նպատակային աշխատանքների միջոցով շրջանում ամրապնդել քաղաքացիների կողմից ոստիկանության հանդեպ վստահությունը¸ որի հաջողությունը պայմանավորեց ոստիկանության յուրաքանչյուր ծառայողի արդար և իր օրինական պահանջներում սկզբունքային լինելու հանգամանքով։
Ոստիկանության պետի հանձնարարականները ուղղված էին նաև հասարակությանը հուզող խնդիրները րոպե առաջ լուծելու հարցում ոստիկանության Մարտունու շրջանային բաժնի¸ Մարտունու շրջվարչկազմի և շրջանի իրավապահ կառույցների միջև համագործակցությունը առավել ամրապնդելու անհրաժեշտությանը։
Ծառայողական պարտականությունների ոչ պատշաճ կատարման համար ոստիկանության պետի հրամանով ոստիկանության Մարտունու շրջբաժնի երեք ծառայողներ ենթարկվեցին «Խիստ նկատողություն» կարգապահական տույժի։
