ԿԱՅՔԻ ՔԱՐՏԵԶ
ԹԵԺ ԳԻԾ
09.10.2014 16:34
Խորհրդակցություն ԼՂՀ ոստիկանությունում
2014թ. հոկտեմբերի 9-ին ԼՂՀ ոստիկանությունում կայացած խորհրդակցության օրակարգը նվիրված էր ընտրացուցակների ճշգրտման վերաբերյալ կատարված աշխատանքների մասին տեղեկանքի քննարկմանը:
Խորհրդակցությունը վարում էր ԼՂՀ ոստիկանության պետի տեղակալ-շտաբի պետ, ոստիկանության գնդապետ Բորիս Ենգիբարյանը:
Մասնակցում էին ԼՂՀ ոստիկանության անձնագրային և վիզաների բաժնի պետը, նույն բաժնի շահագրգիռ ոլորտների, ինչպես նաև ոստիկանության տարածքային ստորաբաժանումների անձնագրային ծառայությունների պատասխանատուները:
Հիմնական զեկույցով հանդես եկավ ԼՂՀ ոստիկանության անձնագրային և վիզաների բաժնի պետ, ոստիկանության գնդապետ Գարրի Միրզոյանը:
ԼՂՀ ոստիկանության պետի տեղակալ-շտաբի պետ, ոստիկանության գնդապետ Բորիս Ենգիբարյանը, առանձին-առանձին վերլուծելով կատարված աշխատանքները, կոնկրետ ժամկետների սահմանմամբ հանձնարարականներ տվեց պատասխանատուներին:
«Առաջնայինը ընտրացուցակների ճշգրիտ կազմումն ու անճշտությունների իսպառ բացառումն է: Այդ նպատակով անհրաժեշտ է ակտիվացնել, մասնավորապես, մայրաքաղաքի որոշ փողոցների առանձնատների վերահասցեավորման աշխատանքները», - նշեց ոստիկանության պետի տեղակալը: Նա անդրադարձավ նաև 16 տարին լրացած անձանց անձնագիր տալու սահմանված կարգին` հանձնարարելով քաղաքացու ցանկության դեպքում այն տրամադրել 16 տարին լրանալու օրը:
Բորիս Ենգիբարյանը, դիմելով խորհրդակցության մասնակիցներին, պահանջեց ավելի հարգալից լինել քաղաքացիների հետ հարաբերություններում և ձեռնարկել բոլոր հնարավոր միջոցները յուրաքանչյուրի հարցին սեղմ ժամկետներում լուծում տալու համար: