ԿԱՅՔԻ ՔԱՐՏԵԶ
ԹԵԺ ԳԻԾ
29.09.2014 19:29
Խորհրդակցություն ԼՂՀ ոստիկանության պետի մոտ
Սույն թվականի սեպտեմբերի 29-ին ԼՂՀ ոստիկանությունում տեղի ունեցավ խորհրդակցություն, որը վարում էր ոստիկանության պետ, գեներալ-մայոր Կամո Աղաջանյանը:
Մասնակցում էին ԼՂՀ ոստիկանության պետի տեղակալները, քրեական հետախուզության և քննչական վարչությունների, ինչպես նաև տարածքային ստորաբաժանումների պատասխանատուները:
Ոստիկանության պետը հատուկ կանգ առավ ծառայության արդյունավետությանը ազդող մի շարք բացթողումների և թերությունների վրա` առանցքային ուղղություններով պատասխանատուներին տալով կոնկրետ հանձնարարականներ:
«Առաջինը յուրաքանչյուր ոստիկանի գործառույթների ճիշտ բաշխումն ու կազմակերպումն է, որը, միանշանակ, պարտավոր է իրականացնել ստորաբաժանման ղեկավարը, իսկ դրա համար անհրաժեշտ է իրականացնել արդյունավետ կադրային քաղաքականություն, պատրաստել բանիմաց կադրերի ռեզերվ, որպեսզի համակարգի յուրաքանչյուր ծառայող, մանավանդ պատասխանատու պաշտոններ զբաղեցնող ղեկավար ունենա իր պաշտոնին համապատասխանող` մասնագիտական և բարոյական հմտություններով օժտված փոխարինող» - նշեց ոստիկանության պետը:
Բացի դրանից, գեներալ-մայոր Կամո Աղաջանյանը ներկաների ուշադրությունը հրավիրեց ինչպես բնակարանային գողությունների բացահայտման, այնպես էլ թմրամիջոցների ապօրինի շրջանառության և ապօրինի որսի հանցատեսակների կանխարգելման և հայտնաբերման աշխատանքների ակտիվացմանը:
