ԿԱՅՔԻ ՔԱՐՏԵԶ
ԹԵԺ ԳԻԾ
19.07.2014 15:04
Խորհրդակցություն Լեռնային Ղարաբաղի Հանրապետության ոստիկանության Ստեփանակերտի քաղաքային վարչությունում
Սույն թվականի հուլիսի 19-ին ոստիկանության Ստեփանակերտի քաղվարչության նիստերի դահլիճում կայացած խորհրդակցությունը նվիրված էր ընթացիկ տարվա 1-ին կիսամյակում Լեռնային Ղարաբաղի Հանրապետության ոստիկանության Ստեփանակերտի քաղաքային վարչության օպերատիվ ծառայողական գործունեության արդյունքների ամփոփմանը:
Խորհրդակցությունը վարում էր ԼՂՀ ոստիկանության պետի առաջին տեղակալ, ոստիկանության գնդապետ Անդրանիկ Հակոբյանը:
Մասնակցում էին ոստիկանության պետի տեղակալ-շտաբի պետ, ոստիկանության գնդապետ Բորիս Ենգիբարյանը, ոստիկանության Ստեփանակերտի քաղվարչության պետ, ոստիկանության փոխգնդապետ Աշոտ Հակոբջանյանը, ոստիկանության Ստեփանակերտի քաղվարչության սպայական ողջ անձնակազմը:
Հիմնական զեկույցով հանդես եկավ ոստիկանության Ստեփանակերտի քաղվարչության պետ, ոստիկանության փոխգնդապետ Աշոտ Հակոբջանյանը:
2014թ. 1-ին կիսամյակում Ստեփանակերտ քաղաքում բոլոր ծառայությունների գծերով գրանցվել է 68 հանցագործության դեպք, նախորդ տարվա նույն ժամանակահատվածի 84-ի դիմաց, նվազումը կազմել է 19 % կամ 16 դեպք:
Հանցագործությունների ընդհանուր թվաքանակի նվազման պարագայում, բնականաբար, նվազել է նաև հանցավորության գործակիցը։ Հաշվետու ժամանակահատվածում 10.000 բնակչին բաժին ընկնող հանցագործությունների թիվը Ստեփանակերտ քաղաքում կազմել է 12.5 (2013 թ. 1-ին կիսամյակում՝ 15.7)։
Ստեփանակերտ քաղաքում արձանագրված հանցագործությունները ըստ տեսակարար կշռի կազմում են հանրապետությունում բոլոր գծերով գրանցված հանցագործությունների 37.8%-ը:
2014թ. 1-ին կիսամյակում կտրուկ նվազել է (1 ընդդեմ 15-ի) տնտեսական գործունեության դեմ ուղղված հանցագործությունների քանակը:
Հաշվետու ժամանակահատվածում 4 դեպքով նվազել են պետական իշխանության, ծառայության և կառավարման կարգի դեմ ուղղված հանցագործությունները (4 ընդդեմ 8-ի):
Անդրադառնալով հանցագործությունների բացահայտման ցուցանիշներին` հատկանշական է, որ վարույթում գտնվող հանցագործությունների բացահայտման ցուցանիշը բարելավել է 8,4%-ով` 89,2%-ից` 97,6%:
Հաշվետու ժամանակահատվածում գրանցված հանցագործություններով 2013թ. 1-ին կիսամյակի համեմատությամբ բացահայտման աշխատանքների արդյունավետության բարելավում է դիտվել բոլոր ուղղություններով` արձանագրելով միայն 100%-անոց բացահայտման ցուցանիշներ:
2014թ. 1-ին կիսամյակում գրանցվել է 4 անչափահասի կողմից կատարված 1 հանցագործության դեպք:
Մարդու կամ անձի դեմ ուղղված հանցագործությունների կանխարգելման կարևորագույն ուղղություններից է ոստիկանության մարմինների կողմից բնակչության մոտ ապօրինի պահվող զենք-զինամթերքի հայտնաբերման և կամավոր հանձնման գործընթացի կազմակերպումը: 2014թ. 1-ին կիսամյակում այդ ուղղությամբ բավականին աշխատանքներ են տարվել. արդյունքում ԼՂՀ ոստիկանության Քրեական հետախուզության և Ստեփանակերտի քաղաքային վարչությունների ծառայողների բացատրական աշխատանքների շնորհիվ կամավոր կերպով հանձնվել է 17 միավոր զենք: Միևնույն ժամանակ քաղաքացիներից առգրավվել է ևս 5 միավոր զենք:
Կատարած աշխատանքների վերաբերյալ հակիրճ զեկույցներով հանդես եկան նաև ոստիկանության Ստեփանակերտի քաղվարչության պետի տեղակալները և ծառայությունների պետերը:
ԼՂՀ ոստիկանության պետի տեղակալ-շտաբի պետ, ոստիկանության գնդապետ Բորիս Ենգիբարյանը զեկույցները լսելուց հետո հատուկ կանգ առավ պրոֆիլակտիկ ծառայության գործունեությանը և մանրակրկիտ վերլուծության ենթարկելով յուրաքանչյուր տեղամասային տեսուչի հաշվետու ժամանակահատվածի կատարած աշխատանքները` կոնկրետ հանձնարարականներ տվեց ծառայության մեջ տեղ գտած թերություններն ու բաղթողումները վերացնելու ուղղությամբ:
Վերջում ԼՂՀ ոստիկանության պետի առաջին տեղակալ, ոստիկանության գնդապետ Անդրանիկ Հակոբյանը ամփոփելով Լեռնային Ղարաբաղի Հանրապետության ոստիկանության Ստեփանակերտի քաղաքային վարչության 1-ին կիսամյակի օպերատիվ ծառայողական գործունեության արդյունքները, նշեց, որ ծառայության արդյունավետության գնահատականը կտրվի միայն ոստիկանության պետ, գեներալ-մայոր Կամո Աղաջանյանի կողմից` ԼՂՀ ոստիկանության 1-ին կիսամյակի օպերատիվ ծառայողական գործունեության արդյունքներով կոլեգիայի նիստի ընթացքում:
«Թմրամիջոցների ապօրինի շրջանառության դեմ տարվող պայքարի, հետախուզվողների և անհայտ կորած անձանց, լատենտային և կոռուպցիոն բնույթի հանցագործությունների հայտնաբերում, կասեցված հանցագործություններով աշխատանքների ակտիվացում, ինչպես նաև հանցագործությունների գրանցման կարգապահության անշեղ իրականացում` ահա այն հիմնական ուղղությունները, որոնց շտկման դեպքում կարող ենք լիարժեք առաջընթաց արձանագրել», - եզրափակեց ԼՂՀ ոստիկանության պետի առաջին տեղակալը: