ԿԱՅՔԻ ՔԱՐՏԵԶ
ԹԵԺ ԳԻԾ
23.10.2015 14:36
ԼՂՀ ոստիկանության պետը քննարկեց ոստիկանության Ստեփանակերտի քաղաքային վարչության 2015թ. 9 ամիսների օպերատիվ-ծառայողական գործունեության արդյունքները
Սույն թվականի հոկտեմբերի 22-ին ոստիկանության Ստեփանակերտի քաղաքային վարչությունում կայացած խորհրդակցության օրակարգը նվիրված էր ոստիկանության Ստեփանակերտի քաղաքային վարչության 2015թ-ի 9 ամիսների օպերատիվ-ծառայողական գործունեության արդյունքների ամփոփմանը:
Խորհրդակցությունը վարում էր ոստիկանության պետ, գեներալ-մայոր Կամո Աղաջանյանը:
Հիմնական զեկույցով հանդես եկավ ոստիկանության Ստեփանակերտի քաղաքային վարչության պետ, ոստիկանության գնդապետ Աշոտ Հակոբջանյանը:
2015թ. 9 ամիսների ընթացքում Ստեփանակերտ քաղաքում բոլոր ծառայությունների գծերով գրանցվել է 111 հանցագործության դեպք՝ նախորդ տարվա նույն ժամանակահատվածի 96-ի համեմատ, աճը կազմել է 15 դեպք կամ 15.6 %.
Ստեփանակերտ քաղաքում արձանագրված հանցագործությունների տեսակարար կշիռը հանրապետությունում բոլոր գծերով գրանցված հանցագործությունների թվում կազմում է 33.5% (2014թ. 9 ամիսների ընթացքում՝ 33%):
Հատուկ կանգ առնելով չբացահայտված հանցագործություններին՝ ԼՂՀ ոստիկանության պետը պահանջեց մեկ առ մեկ ներկայացնել և վերլուծել դրանք: Իր խորին մտահոգությունը հայտնելով հատկապես բնակարանային գողությունների առումով՝ գեներալ-մայոր Կամո Աղաջանյանը կոնկրետ հանձնարարականներ տվեց այդ ուղղությամբ. մինչև ընթացիկ տարվա արդյունքների ամփոփումը շեշտակի առաջընթաց ապահովել այս գործում՝ պահպանելով հանցագործությունների գրանցման կարգապահությունը և բացարձակապես ձերբազատվելով հանցագործությունները թաքցնելու արատավոր երևույթից:
Գեներալ-մայոր Կամո Աղաջանյանը կարևորեց անչափահասների շրջանում իրականացվող աշխատանքների, ինչպես նաև տեղամասային տեսուչների ինստիտուտի կայացման և ամրապնդման առաջնահերթությունները՝ վերջինիս պարագան համարեց հասարակության կողմից ոստիկանության հանդեպ վստահության ամրապնդման կարևորագույն կամուրջ:
«Սովորեք պատասխան տալ Ձեր խղճի առաջ, համբերատարությամբ լսեք քաղաքացուն և վերաբերվեք այնպես, ինչպես կուզենայիք, որ վերաբերվեին Ձեզ: Պարկեշտություն և ազնվություն՝ միախառնված մասնագիտական արհեստավարժությամբ: Ահա Արցախի ժամանակակից ոստիկանի կերպարը, որից դուրս անհնար է պատկերացնել իրավակարգի զինվորին», - եզրափակեց ոստիկանության պետը: