ԿԱՅՔԻ ՔԱՐՏԵԶ
ԹԵԺ ԳԻԾ
30.11.2016 10:45
ԼՂՀ ոստիկանության պետ, գեներալ-մայոր Կամո Աղաջանյանի շնորհավորական ուղերձը ոստիկանության ծառայողի մասնագիտական օրվա առթիվ
Արցախի Հանրապետության ոստիկանության հարգելի ծառայողներ, վաստակաշատ վետերաններ.
Այս տարի մենք նշում ենք ոստիկանության կազմավորման 15-ամյակը։
15 տարին բավականին ժամանակահատված է անցածը գնահատելու, ձեռքբերումներն արժևորելու և ամենակարևորը՝ նոր խնդիրներ առաջադրելու ու դրանք կյանքի կոչելու ուղիները հստակ մատնանշելու համար։
Առաջին հերթին՝ որպես ձեռքբերում կարող ենք արձանագրել հանրապետության ներքին անվտանգության բարձր աստիճանի ապահովումը, որը պայմանավորվում է ինչպես մեր ժողովրդի հոգեկերտվածքով, այնպես էլ հանրապետության իրավապահ կառույցների, այդ թվում ոստիկանության համապարփակ գործունեությամբ։ Դրա հետ մեկտեղ մենք դեռ երկար ճանապարհ ունենք անցնելու հասարակության վստահությանը լիարժեք արժանանալու համար։ Այս գործում մեզնից պահանջվում է ամբողջական նվիրվածություն, սկզբունքայնություն, արդարամտություն և դիմացինի ցավը որպես սեփական խնդիր ընդունելու կարողություն։
Հարգելի գործընկերներ, համակարգը փառապանծ ուղի է անցել իր գոյության ողջ պատմության ընթացքում։ Այսօր էլ իրավակարգի զինվոր լինելուց զատ՝ մենք առավելապես հայրենյաց պաշտպաններ ենք։ Դրա հետ մեկտեղ պարտավոր ենք ուժերի գերլարմամբ շարունակել ապահովել մեր երկրի ներքին անվտանգությունը, իսպառ բացառել հանցավոր դրսևորումները և բոլոր պայմանները ստեղծել մեր ժողովրդի խաղաղ ու անվտանգ կենսագործունեությունը ապահովելու համար։
Մասնագիտական տոնի կապակցությամբ շնորհավորում եմ հող հայրենիի համար նահատակված մեր ոստիկանների ընտանիքներին, ոստիկանության հաշմանդամներին, բազմավաստակ վետերաններին, ոստիկանության ողջ անձնակազմին, մաղթում եմ առողջություն և անձնական երջանկություն:
Ոստիկանության գործունեության արդյունավետությունը բարձրացնելու գործում կարևորում եմ նաև ոստիկանության վետերանների դերակատարումը, նրանց բազմամյա փորձն ու մասնագիտական գիտելիքները երիտասարդ կադրերին փոխանցելու անհրաժեշտությունը:
