ԿԱՅՔԻ ՔԱՐՏԵԶ
ԹԵԺ ԳԻԾ
30.11.2014 00:10
ԼՂՀ ոստիկանության պետ, գեներալ-մայոր Կամո Աղաջանյանի շնորհավորական ուղերձը ոստիկանության ծառայողի մասնագիտական օրվա առթիվ
Ոստիկանության հարգելի ծառայողներ¸ վաստակաշատ վետերաններ,
Առաջին տարին է, որ մեր հանրապետությունում նոյեմբերի 30-ին նշվում է ոստիկանության ծառայողի մասնագիտական օրը:
Նորություն չէ¸ որ ոստիկանության գործունեությունը գտնվում է հասարակության ուշադրության կիզակետում¸ իսկ ոստիկանի վարքն ու դիմագիծը ուղղակիորեն կապվում են պետության նկարագրի հետ¸ ուստի մենք պարտավոր ենք ամենայն նախանձախնդրությամբ իրականացնել մեր պարտականությունները` պաշտպանել պետության և հասարակության շահերը¸ մարդու իրավունքներն ու ազատությունները:
Ոստիկանության գործունեության արդյունավետությունը բարձրացնելու գործում կարևորում եմ նաև ոստիկանության վետերանների դերակատարումը¸ նրանց բազմամյա փորձն ու մասնագիտական գիտելիքները երիտասարդ կադրերին փոխանցելու անհրաժեշտությունը:
Հարգելի գործընկերներ, համոզված եմ¸ որ հավատարիմ եք ոստիկանությունում բարեփոխումներ իրականացնելու ընթացքին¸ որը նպատակաուղղված է ամրապնդել ոստիկանի հանդեպ հասարակության վստահությունը¸ համակարգը համալրել երիտասարդ, մասնագիտական բարձր հմտություններ ունեցող և բարոյական վեհ հատկանիշներով օժտված ոստիկաններով:
Ձեր անունից պատիվ ունեմ հավաստիացնելու մեր ժողովրդին¸ որ գոյապայքարի տարիների օրինակով այսօր էլ ոստիկանությունը պատրաստակամ է անողոք ու անզիջում պայքար մղել մեր երկրի անվտանգությանը սպառնացող արտաքին թշնամու դեմ:
Ոստիկանությունն անդրդվելի է հանցավորության դեմ մղվող ամենօրյա պայքարը արժանապատվորեն իրականացնելու և օրենքի գերակայությունը լիարժեք ապահովելու գործում:
Մասնագիտական տոնի կապակցությամբ շնորհավորում եմ հող հայրենիի համար նահատակված մեր ոստիկանների ընտանիքներին, ոստիկանության հաշմանդամներին¸ բազմավաստակ վետերաններին, ոստիկանության ողջ անձնակազմին, մաղթում եմ առողջություն և անձնական երջանկություն:
Իրավակարգի մշտարթուն զինվորներ, քայլեք ժամանակի պահանջներին համաքայլ և հիշեք¸ որ ձեզ մեծ առաքելություն է տրված` ծառայել պետությանն ու այն ժողովրդին¸ որ փառավոր զավակների արյան գնով է նվաճել սեփական հողում ազատ ապրելու իր իրավունքը: