Թմրանյութ և ռազմամթերք՝ «Կանեփ-կակաչ» համալիր միջոցառման ընթացքում

Սեպտեմբերի 27-ին «Կանեփ-կակաչ» համալիր միջոցառման ընթացքում թմրանյութ պահելու կասկածանքով զննության են ենթարկվել.

-Շուշի քաղաքի  Անդրանիկի փողոցի N տան բնակիչ 1952թ. ծնված Լ.Ա-ին պատկանող առանձնատունը, որտեղ հայտնաբերվել է 5.2 գրամ ընդհանուր քաշով կանաչ գույնի սպեցիֆիկ հոտով մանրացված և չորացված կանեփանման բույսի զանգված և  0.5 գրամ կանեփանման բույսի սերմեր:

-Շուշիի շրջանի Քիրսավան գյուղի բնակիչ 1958թ. ծնված Վ. Հ-ի ժամանակավոր կացարանը, որի պատշգամբի պատից կախված զինվորական բաճկոնի գրպանում և պատուհանագոգի վրա հայտնաբերվել է 1,3 գրամ ընդհանուր քաշով սպեցիֆիկ հոտով կանեփանման բույսի չորացված, մանրացված զանգված և կանեփանման բույսի շագանակագույն 1 գնդիկ, իսկ բակում տեղադրված ցինկապատ խողովակից հայտնաբերվել է ապակե տարա, որի մեջ առկա էր թվով 50 հատ կանեփանման բույսի սերմեր:

-Քիրսավան գյուղի բնակիչ 1968թ. ծնված Ա. Չ-ին պատկանող առանձնատունը, որի սենյակի պատուհանագոգից հայտնաբերվել է թղթի մեջ փաթեթավորված 9 գրամ ընդհանուր քաշով սպեցիֆիկ հոտով մանրացված և չորացված կանեփանման բույսի զանգված, իսկ նույն առանձնատան հողամասից և հարակից գոմի կտուրից՝ 2 հատ մշակված կանեփանման բույսեր:

-Քաշաթաղի շրջանի Սպիտակաջուր գյուղի բնակիչ 1970թ. ծնված Տ. Մ-ի տունը, որտեղ հայտնաբերվել է 0.7 գրամ ընդհանուր քաշով կանաչ գույնի սպեցիֆիկ հոտով մանրացված և չորացված կանեփանման բույսի զանգված, իսկ նրա գրպանում` 71 հատ կանեփանման բույսի սերմեր:

-Քաշաթաղի շրջանի Շրվական գյուղի բնակիչ 1960թ. ծնված Ա. Բ-ի տունը, որի ներքնահարկում ձմեռային գլխարկի մեջ հայտնաբերվել է ինքնաձիգի 1 հատ պահեստատուփ և 7.62 մմ տրամաչափի 27 փամփուշտ, իսկ տան հարակից հողամասում վերջինիս կողմից ցանված և մշակված կանեփանման բույսի 39 թուփ:  

Նույն միջոցառման ընթացքում Քաշաթաղի շրջանի Սարատակ գյուղի բնակիչ 1969թ. ծնված Վ. Հ-ն և նույն շրջանի Որոտան քաղաքի բնակիչ 1969թ. ծնված Ա.Մ-ն կամովին ոստիկանության Քաշաթաղի շրջբաժնի ծառայողներին են հանձնել համապատասխանաբար «Ֆ-1» տիպի 3 նռնակ առանց պայթուցիչների և «ՌԳԴ-5» տիպի 1 նռնակ ու  5.45 մմ տրամաչափի 90 փամփուշտ: