ԿԱՅՔԻ ՔԱՐՏԵԶ
ԹԵԺ ԳԻԾ
16.08.2019 11:34
ԶՐԿՎԱԾ ԼԻՆԵԼՈՎ ՏՐԱՆՍՊՈՐՏԱՅԻՆ ՄԻՋՈՑ ՎԱՐԵԼՈՒ ԻՐԱՎՈՒՆՔԻՑ՝ ԱՆՍԹԱՓ ՎԻՃԱԿՈՒՄ ՎԱՐԵԼ Է ԱՅՆ
Ս.թ.օգոստոսի 15-ին ԱՀ ոստիկանության ճանապարհային ոստիկանության ծառայողը զեկուցագիր է ներկայացրել ԱՀ ոստիկանության Ստեփանակերտ քաղաքի վարչություն առ այն, որ մայրաքաղաքի բնակիչ, 1981թ.ծնված Մ. Օ-ի կողմից ճանապարհային երթևեկության կանոնները խախտելու ընթացքում իրականացված վարչական վարույթի ընթացքում պարզվել է, որ վերջինս ս.թ. հուլիսի 5-ից զրկված լինելով տրանսպորտային միջոց վարելու իրավունքից, հուլիսի 20-ին անսթափ վիճակում կրկին անգամ վարել է այն:
Նախապատրաստվում են նյութեր ըստ ենթակայության ուղարկելու համար:
Հիշեցնում ենք ԱՀ քրեական օրենսգրքի 254.1 հոդվածով նախատեսված պատասխանատվության մասին։
Համաձայն հոդվածի 1-ին մասի` տրանսպորտային միջոցներ վարելու իրավունքից զրկված անձի կողմից տրանսպորտային միջոց վարելը` պատժվում է տուգանքով՝ նվազագույն աշխատավարձի երկուհարյուրապատիկից երեքհարյուրապատիկի չափով:
Նույն հոդվածի 2-րդ մասով սահմանվում է, որ տրանսպորտային միջոցներ վարելու իրավունքից զրկված անձի կողմից ոչ սթափ վիճակում տրանսպորտային միջոց վարելը կամ այդ անձի կողմից սթափության վիճակի զննություն անցնելուց հրաժարվելը կամ խուսափելը` պատժվում է տուգանքով՝ նվազագույն աշխատավարձի երեքհարյուրապատիկից հինգհարյուրապատիկի չափով, կամ ազատազրկմամբ՝ վեց ամսից մեկ տարի ժամկետով: