ԿԱՅՔԻ ՔԱՐՏԵԶ
ԹԵԺ ԳԻԾ
29.08.2018 10:18
ԱՀ ոստիկանության պետը պարգևատրեց ծառայողական եռամարտի առաջնության մրցանակակիրներին
Արցախի Հանրապետության կառավարության որոշմամբ հաստատված ոստիկանության կանոնադրության համապատասխան դրույթի համաձայն, Արցախի Հանրապետության ոստիկանության պետի հրամանով սույն թվականի օգոստոսի 28-ին կազմակերպվել և անցկացվել է ոստիկանության ծառայողական եռամարտի առաջնություն։
Առաջնությանը մասնակցում էին ոստիկանության բոլոր ստորաբաժանումների երեքական ծառայողների և մեկ ներկայացուցչի կազմով ընտրված թիմերը։
Եռամարտի առաջին վարժությունը «Մակարով» տեսակի ատրճանակով կատարվող հրաձգությունն էր, որին հաջորդեց նռնակի նետում, իսկ վերջում արդեն 100 մետր վազք տարածությունում վարժաձևը։ Ոստիկանության ծառայողները մեծ ոգևորությամբ էին մասնակցում եռամարտի առաջնությանը։ Բնական է, որ նրանցից յուքանչյուրը ձգտում է գրանցել ամենաբարձր ցուցանիշը և գերազանցել գործընկերոջը։
Այնուհետև տեղի ունեցավ պարգևատրման արարողություն։ Ծառայողական եռամարտի առաջնության թիմերին շնորհավորելու էր եկել Արցախի Հանրապետության ոստիկանության պետ, ոստիկանության գնդապետ Իգոր Գրիգորյանը։ Կարևորելով նման առաջնությունների իրականացումը ոստիկանության ծառայողների մարտական և ֆիզիկական պատրաստականության մակարդակի բարձրացման առումով, ոստիկանության պետը համոզմունք հայտնեց, որ ֆիզիկական և մարտական պատրաստականության բաժանմունքը ավելի հաճախակի կկազմակերպի և կիրականացնի նման միջոցառումներ։
Թիմային կարգով առաջին հորիզոնականը նվաճած ոստիկանության Շահումյանի շրջբաժնի, երկրորդ հորիզոնականը՝ ոստիկանության պետական պահպանության վարչության և երրորդ հորիզոնականը՝ ոստիկանության կենտրոնական ապարատի հավաքականները արժանացան դրամական պարգևի, իսկ ընդհանուր ծառայողական եռամարտի լավագույն արդյունքներ արձանագրած ոստիկանության պետական պահպանության վարչության ծառայության բաժնի տեսուչ-թիկնապահ, ոստիկանության կապիտան Վագիֆ Մինասյանը պարգևատրվեց արժեքավոր նվերով։